Kea 'a 'beɔdɛ se "ti ‑ta 'ble
145
Dafi 'a Kea 'a 'nynɩ "i 'bɛɛ‑ dʋ‑.
'Ma muɛ ɛɛ' 'nynɩ "i 'bɛɛa' mamaʋ 'sʋ,
ɛ se "ti ‑ta 'ble i 'oo Tʋ "bo,
'ma Kea, 'ma Tʋ "bo.
2 Kɩɩn, 'ma muɛ ɛɛ 'nynɩ "i 'bɛɛa' 'wɩ ‑wee'‑ di.
'Ma muɛ ɛɛ' 'nynɩ "i 'bɛɛa' mamaʋ 'sʋ,
ɛ se "ti ‑ta 'ble i.
3 Tʋ "bo "bɛi, ‑wɛe ɛ nɩ 'nynɩ ‑sa ka‑,
nyʋ se ɛɛ' "i 'bɛa' 'dei 'wɔn i.
4 Ka nyʋ 'a "ji tbaa "i 'tmʋʋ ba,
ka ɛɛ' nʋʋdɩ nmɔa "jrii ɛ.
‑Wɛe ʋʋ 'je ɛɛ' nʋʋdɩ i 'jrɛɛ‑!
5 ‑Ma 'beɔ nɩa' ke, ‑ma dɛwɔnɩa' a fan'.
‑Bo ɛ nɩ 'mɔ ɛ, 'ma muɛ 'dɔe ‑ɩn nʋa 'a ‑tɩ' tɔ' "kpei naa'.
6 Nyʋ a muɛ ɛɛ' "ikmaa' 'kpa poa',
‑wɛe dɩ klae" ɛ nʋa, 'ɩn 'je ɩa' ‑tɩ' 'tmʋ.
7 Ɛɛ' 'dɔe ‑tuu" ‑tuu ɛ nʋa,
nyʋ 'je ɩa' ‑tɩ' 'tmʋ.
Nyʋ 'je ble ɛɛ' nyʋ 'pʋʋ ‑tɩ.
8 Tʋ "bo a 'jeɛ nyʋ 'a wɛe,
ɛɛ 'wɔn nyʋ 'a 'kmʋ 'mii,
ɛɛ' 'cɛn tɛɛn o, ‑wɛe 'diwɔnmɔa' ‑ji" 'de ɛ 'ʋn.
9 Tʋ "bo nmɔ 'diwɔn 'de nyʋ ‑wee'‑ "klein ‑pee,
ɛɛ 'jeɛ dɛ ‑wee'‑ "klein 'a wɛe.
10 Ɛɛ' nʋʋdɩ ‑wee'‑ "klein a muɛ 'nynɩ ‑saa', Tʋ "bo.
Ɛɛ' 'cɛ ‑wee'‑ a muɛ "diwan‑ poa',
ʋʋa muɛ ɛɛ' 'nynɩ "i 'bɛɛa'.
11 Ka ɛɛ' 'beɔdɛ ɛ nʋa ‑sansan,
‑wɛe ka ɛ kmai" ɛ,
nyʋ a muɩ 'tmʋa 'de nyʋ ‑wee'‑ ‑pee.
12 'De ɛɛ' "ikmaa' ke ɛɛ' 'beɔdɛ ‑ɛɛ nʋa ‑sansan nyʋ 'jɩ nyʋ tɔɔ ‑o.
13 Ɛɛ' 'beɔ nɩa' nɩ' 'de 'wɩ 'oo 'wɩ ‑wee'‑ "klein 'di,
‑wɛe ‑ma Tʋ "bo nɩa' nɩ' 'de ‑sʋn 'oo ‑sʋn 'di.
Tʋ "bo a kpʋn ɛ wlu "kpei.
Dɩ "klein ɛ nʋa,
nyʋ 'a ‑tɩ' kmaa' "ji 'de ɛ 'ʋn ɛ.
14 Tʋ "bo a ‑teɛ' nyʋ "klein ‑a ‑kai' kwa wɛi,
‑wɛe ɛɛ "isrɛɛ nyʋ ‑klɛɛan 'ʋn ‑wee'‑ "i.
15 Nyʋ ‑wee'‑ "klein 'a "jri nɩɛ ‑ʋn ‑pʋn",
ʋʋa fuo ‑ʋn ‑ɛ, ‑wɛe ‑ɩn ‑je ʋʋpʋ diiɛ "nyɩ,
nɔ" ‑ma ‑cɛ" 'kpa nɩa "i ɛ.
16 Ɛɛ 'baiɛ kwa,
‑wɛe dɛ "klein 'kmʋ nɩ feeɛ' nɩa 'ʋn a dbo.
17 Tʋ "bo "srɛi 'de ɛɛ' nʋʋdɩ ‑wee'‑ 'ʋn,
‑wɛe ɛɛ 'je nyʋ 'a wɛe,
'de ɛɛ' nʋʋdɩ ‑wee'‑ "klein 'ʋn.
18 Nyʋ ‑a poa Tʋ "bo ‑too"‑ "i, ɛɛ jiɛ ʋʋpʋ‑ o,
kɩɩn, nyʋ ‑a poɛ ‑too"‑ "i,
'de tɔ' ‑tɩ 'ʋn ɛɛ jiɛ ʋʋpʋ‑ o.
19 Ɛɛ nʋɛ nyʋ "klein ‑a ‑teɛ' ɛɛ' ni 'a ‑kwlʋtɩ,
ɛɛ 'wɔn ʋʋa "wɔwlu 'mɛ, ‑wɛe ɛɛ 'pʋʋ ʋʋpʋ‑.
20 Nyʋ "klein ‑kma Tʋ "bo 'a ‑tɩ' ɛ,
ɛɛ fuɛ ʋʋpʋ‑ i,
'de ɛɛ ‑sa 'diwɔnyniʋn ‑wee'‑ 'a ma" i.
21 'Ma muɛ 'nynɩ ‑saa', 'oo Tʋ "bo.
Dɩ "klein ‑ɩn nʋa,
ɩ 'je ‑mɔ Kea ‑kwea i 'a 'nynɩ "i 'bɛɛ‑ ‑o jeejee.